اگر آپ کے اسمارٹ فون کی بیٹری بہت تیزی سے ختم ہوجاتی ہے تو ایک معمولی سیٹنگ تبدیل کرکے بیٹری لائف کو کسی حد تک بہتر بنایا جاسکتا ہے۔
اسمارٹ فون کی بیٹری جلد ختم ہونے کی مختلف وجوہات ہوسکتی ہیں، تاہم ماہرین کے مطابق موبائل ڈیٹا کو ہر وقت آن رکھنے سے بھی بیٹری پر اضافی بوجھ پڑتا ہے۔
موبائل ڈیٹا بند رکھنے کا فائدہ
اکثر صارفین کے فون میں موبائل ڈیٹا ہر وقت فعال رہتا ہے، حتیٰ کہ وائی فائی استعمال کرتے ہوئے بھی۔
موبائل ڈیٹا آن ہونے کی صورت میں فون سیلولر نیٹ ورک سے مسلسل منسلک رہنے کی کوشش کرتا ہے۔ جب وائی فائی بند ہوتا ہے یا صارف وائی فائی کی حدود سے باہر جاتا ہے تو فون فوری طور پر موبائل نیٹ ورک پر منتقل ہوجاتا ہے۔
اس دوران فون کو سیلولر کنکشن برقرار رکھنے کے لیے اضافی بیٹری پاور استعمال کرنا پڑ سکتی ہے۔
اگر آپ وائی فائی استعمال کررہے ہیں اور موبائل ڈیٹا کی ضرورت نہیں تو اسے بند رکھنے سے بیٹری کے غیر ضروری استعمال کو کم کرنے میں مدد مل سکتی ہے۔
ایک معمولی سا نقصان
موبائل ڈیٹا بند رکھنے کا ایک نقصان یہ ہے کہ جب آپ وائی فائی کی حدود سے باہر نکلیں گے تو دوبارہ موبائل ڈیٹا آن کرنے کے بعد فون کو سیلولر نیٹ ورک سے منسلک ہونے میں چند سیکنڈ لگ سکتے ہیں۔
یعنی بیٹری بچانے کے لیے وائی فائی استعمال کرتے وقت موبائل ڈیٹا بند رکھنا ایک آسان سیٹنگ ہوسکتی ہے۔
