لاہور:وزیراعلیٰ پنجاب مریم نواز لاہور کے میو اسپتال پہنچیں تو مریضوں نے شکایات کے انبار لگا دیے۔اس موقع پر مریم نواز نے میو اسپتال کی انتظامیہ کی سخت سرزنش کی اور ایم ایس کو عہدے سے فوری ہٹانے کا حکم دے دیا۔
وزیراعلیٰ پنجاب مریم نواز نے کہا کہ لوگ اسپتال میں علاج کی توقع اور امید لے کر آتے ہیں، کس وارڈ میں کیا ہو رہا ہے، اسپتال انتظامیہ کو علم ہی نہیں۔
مریم نواز نے کہا کہ جو عوام کے ساتھ ہو رہا ہے ذمہ داروں کے اپنوں کے ساتھ ہو تو پتا چلے۔میو اسپتال میں زیرِ علاج مریضوں اور لواحقین نے سرنج اور برنولا وغیرہ تک نہ ملنےکا وزیراعلیٰ کو بتایا تھا۔مریم نواز نے انتظارِ گاہ اور راستے میں کھڑے مریضوں اور لواحقین کی شکایات سنیں اور میو اسپتال میں ہی ہنگامی اجلاس کی صدارت بھی کی۔
انہوں نے دواؤں کے واجبات کی ادائیگی کے لیے فوری اقدامات کا حکم دیا اور میو اسپتال میں ادویات کی 100فیصد فراہمی یقینی بنانے کی ہدایت کی۔
