ٹیسٹ میں پاکستان کی بیٹنگ لائن ایک بار پھر ناکام ہوگئی، قومی ٹیم انگلینڈ کے خلاف پہلی اننگز میں صرف 110 رنز بنا کر پویلین لوٹ گئی۔ میزبان ٹیم کو پہلی اننگز میں 180 رنز کی برتری حاصل ہوگئی۔
لارڈز میں کھیلے جارہے دوسرے ٹیسٹ کے دوسرے روز انگلینڈ نے 9 وکٹوں کے نقصان پر 248 رنز سے اپنی پہلی اننگز دوبارہ شروع کی اور پوری ٹیم 290 رنز بنا کر آؤٹ ہوگئی۔
پاکستان کی جانب سے محمد عباس نے 4 جبکہ محمد علی نے 3 وکٹیں حاصل کیں۔
انگلینڈ کے 290 رنز کے جواب میں پاکستان کی بیٹنگ ایک بار پھر مشکلات کا شکار رہی اور پوری ٹیم 110 رنز پر آؤٹ ہوگئی۔
پاکستان کے 8 بیٹرز ڈبل فگرز میں بھی داخل نہ ہوسکے۔ کپتان شان مسعود صرف ایک، عبداللہ شفیق 5، بابر اعظم 8، محمد رضوان 7 اور محمد عباس 2 رنز بنا کر آؤٹ ہوئے، جبکہ علی عثمان اور خرم شہزاد ایک، ایک رن بنا سکے۔
پاکستان کی جانب سے اذان اویس نے سب سے زیادہ 46 رنز بنائے جبکہ سعود شکیل 16 رنز کے ساتھ نمایاں رہے۔
اوپننگ بیٹر امام الحق پنڈلی کی تکلیف کے باعث بیٹنگ کے لیے میدان میں نہیں اترے۔
انگلینڈ کی جانب سے اولی رابنسن نے 4 جبکہ جوفرا آرچر نے 3 وکٹیں حاصل کیں۔
یوں انگلینڈ کو پاکستان کے خلاف پہلی اننگز میں 180 رنز کی بڑی برتری حاصل ہوگئی ہے، جس کے باعث قومی ٹیم پر میچ میں دباؤ مزید بڑھ گیا ہے۔
مصنف نے جامعہ گجرات سے صحافت کی تعلیم حاصل کی ہے اخبار کیساتھ ڈیجیٹل صحافت سے منسلک ہیں۔
