واشنگٹن: امریکی صدر ڈونلڈ ٹرمپ نے ایران کو سخت انتباہ دیتے ہوئے کہا ہے کہ اگر آبنائے ہرمز میں کسی بھی بحری جہاز پر حملہ کیا گیا تو امریکہ اس کے جواب میں ایران کے اہم انفراسٹرکچر کو نشانہ بنائے گا۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ اگر اسلامی جمہوریہ ایران کسی بحری جہاز پر میزائل، راکٹ، ڈرون یا کسی بھی دوسرے ہتھیار سے حملہ کرتا ہے تو امریکہ فوری ردعمل دے گا۔
انہوں نے کہا کہ ایسی کسی بھی کارروائی کی صورت میں ایرانی پلوں، بجلی گھروں اور دیگر اہم تنصیبات پر بمباری کی جائے گی۔ ٹرمپ کے مطابق ممکنہ اہداف میں تہران کے قریب اور دارالحکومت تہران کے اندر واقع اہم تنصیبات بھی شامل ہو سکتی ہیں۔
امریکی صدر کا کہنا تھا کہ ایران کو یہ واضح پیغام دیا جا رہا ہے کہ بین الاقوامی بحری گزرگاہوں میں جہاز رانی کو خطرے میں ڈالنے کی کسی بھی کوشش کا سخت جواب دیا جائے گا۔
ٹرمپ کے بیان کے بعد خطے میں کشیدگی مزید بڑھنے کا خدشہ ظاہر کیا جا رہا ہے، جبکہ آبنائے ہرمز کو عالمی تجارت اور تیل کی ترسیل کے لیے انتہائی اہم بحری راستہ تصور کیا جاتا ہے۔ بین الاقوامی مبصرین کے مطابق اس حساس گزرگاہ میں کسی بھی قسم کی فوجی کارروائی کے عالمی معیشت پر بھی گہرے اثرات مرتب ہو سکتے ہیں۔
