بھارتی کرکٹ بورڈ (بی سی سی آئی) نے قومی ٹیم کے اوپنر اور سابق کپتان روہت شرما کی ریٹائرمنٹ سے متعلق زیرِ گردش خبروں کی تردید کردی۔
بھارتی میڈیا کے مطابق بی سی سی آئی کے سیکرٹری دیواجیت سائیکیا نے ان خبروں کو مسترد کرتے ہوئے کہا ہے کہ بورڈ میں روہت شرما کے ریٹائرمنٹ کے حوالے سے کوئی بات چیت نہیں ہوئی۔
انہوں نے واضح کیا کہ انگلینڈ کے خلاف لارڈز ون ڈے روہت شرما کا آخری انٹرنیشنل ون ڈے میچ نہیں ہے اور وہ بدستور بھارتی ون ڈے اسکواڈ کا حصہ ہیں۔
بی سی سی آئی سیکرٹری کا کہنا تھا کہ روہت شرما ٹیم کے اہم کھلاڑی ہیں اور جب تک وہ ٹیم کے منصوبوں کا حصہ رہیں گے، بھارت کی نمائندگی کرتے رہیں گے۔ اس وقت ٹیم کی تمام تر توجہ انگلینڈ کے خلاف جاری سیریز پر مرکوز ہے۔
خیال رہے کہ بھارتی میڈیا میں گزشتہ دنوں ایسی خبریں سامنے آئی تھیں کہ 2027 کے ون ڈے ورلڈ کپ کی تیاریوں کے پیش نظر بھارتی سلیکٹرز مستقبل کی حکمت عملی پر غور کر رہے ہیں، جس میں روہت شرما کے بغیر ٹیم بنانے کا امکان بھی ظاہر کیا گیا تھا۔
روہت شرما کے مستقبل سے متعلق قیاس آرائیوں میں اس وقت اضافہ ہوا جب انگلینڈ کے خلاف ابتدائی ون ڈے میچز میں وہ بڑی اننگز کھیلنے میں کامیاب نہ ہوسکے۔ انہوں نے پہلے میچ میں 11 جبکہ دوسرے ون ڈے میں 26 رنز بنائے تھے۔
تاہم بی سی سی آئی کی جانب سے وضاحت کے بعد روہت شرما کی ریٹائرمنٹ سے متعلق خبروں کو فی الحال قیاس آرائیاں قرار دیا جا رہا ہے۔
