ڈپٹی کمشنرمحمدعلی کی ہدایت پر شہر میں پیشہ ور بھکاریوں کے خلاف اپریشن کو تیز کر دیا گیا ہے اس سلسلے میں محکمہ سماجی بہبود کی چار ٹیموں نے گزشتہ روز شہر کے مختلف علاقوں کارروائی کرتے ہوئے 51 بھکاریوں کو تحویل میں لیا جن میں 28 مرد‘ 20 خواتین اور تین بچے شامل تھے۔ ایڈیشنل ڈپٹی کمشنر (جنرل) میاں آفتاب احمد نے انسداد گداگری مہم کا جائزہ لیا اور محکمہ سماجی بہبود کی کارکردگی کو چیک کرتے ہوئے بتایا کہ گداگری کا پیشہ کروانے والے مافیا کو قانون کی گرفت میں لانے کے لئے حکمت عملی وضع کی گئی ہے جو مختلف چوکوں میں خواتین و مرد بھکاریوں کو بھیک مانگنے کے لئے چھوڑ کر جاتے اور شام کو لے جاتے ہیں اوریہی مافیا اس گھناؤنے دھندے کو فروغ دینے کا موجب ہے۔ انہوں نے ہدایت کی کہ تحویل میں لئے گئے بھکاریوں کو اولڈ ایج ہوم‘دارالامان اور چائلڈ پروٹیکیشن بیورو میں رکھیں اور ان کی سرپرستی کرنے والوں کے خلاف قانون کے تحت کارروائی عمل میں لائیں۔ ڈپٹی ڈائریکٹر سوشل ویلفیئر خالد بشیر اور فوکل پرسن / سوشل ویلفیئر آفیسر ریحانہ یاسمین نے انسداد گداگری مہم کی نگرانی کی۔ انہوں نے بتایا کہ پیشہ ور بھکاریوں کے خلاف اپریشن کے لئے چار ٹیمیں مقرر کی گئی ہیں جن کی طرف سے ڈھڈی والا‘کوہ نور چوک‘ عبداللہ پور‘ ریلوے اسٹیشن‘ٹرانسپورٹ اڈوں‘ ریلوے روڈ‘ جی ٹی ایس چوک‘ سلیمی چوک‘ستیانہ روڈ گیٹ کے روٹ‘ چناب کلب چوک‘ لاری اڈا‘ ملت چوک‘ الائیڈ ہسپتال‘ اکبر آباد موڑ‘ بلال مسجد کے روٹ‘ چوک گھنٹہ گھر‘ کچہری بازار‘ نڑ والا چوک‘ یونیورسٹی چوک‘ منروا کلب کے روٹ‘ رضا آباد‘ مرضی پورہ‘ غلام محمد آباد‘ جناح کالونی‘ دھوبی گھاٹ کے روٹ پر الگ الگ دو شفٹوں میں بھکاریوں کے خلاف اپریشن کیا جارہا ہے
ABC Certified and APNS/CPNE Member Newspaper