اطلاعات و نشریات کے بارے میں وزیراعظم کی معاون خصوصی ڈاکٹر فردوس عاشق اعوان نے کہا ہے کہ وزیراعظم عمران خان تمام صوبوں کےعوام کے حقوق کا تحفظ یقینی بنائیں گے۔
آج متعدد ٹویٹس میں انہوں نے کہا کہ مشترکہ مفادات کونسل کا اجلاس وفاق کی تمام اکائیوں کو ساتھ لے کر چلنےکاوزیراعظم کے عزم کا عملی ثبوت ہے۔
معاون خصوصی نے کہا کہ وزیراعظم نے صوبوں کے درمیان گیس رائلٹی او ر پانی کی منصفانہ تقسیم کی ہدایت کی۔ انہوں نے کہا کہ ٹیلی میٹری نظام پانی کی منصفانہ تقسیم یقینی بنانے میں معاون ثابت ہوگا۔
انہوں نے کہا کہ باہمی مشاورت سے یکساں تعلیم اور معیاری تحقیق سے متعلق تفصیلات طے کرنے پر اتفاق رائے کا بھرپور خیرمقدم کیاگیا ہے۔
اجلاس میں حویلی بہادر شاہ اور بلوکی بجلی گھروں کی نجکاری سے متعلق آگاہ کرنے اور واپڈا کے چیف ایگزیکٹو کے عہدے کے لئے اہل شخص کے انتخاب کا بھی فیصلہ کیا گیا۔
