مودی پہلے مرحلے کے انتخابات میں ووٹ نہ ملنے پر پاکستان کے حالات خراب کر سکتا ہے، شیخ رشید

لاہور (این این آئی )وفاقی وزیر ریلوے شیخ رشید احمد نے کہا ہے کہ وزیر اعظم عمران خان چین اور ایران کے دورے کے بعد سفیروں اور ان کی فیملیوں کو ریل کے سفر کی دعوت دیں گے جنہیں اٹک خورد تک سفر کروایا جائے گا اورواپسی پر راولپنڈی میں وزیراعظم کی طرف سے ظہرانہ دیا جائے گا ۔

مودی کو پہلے مرحلے کے انتخابات میں اس کی خواہش اور سوچ کے مطابق ووٹ نہ ملے تو وہ پاکستان کے اندرونی حالات خراب کر سکتا ہے ۔ان خیالات کا اظہارا نہوں نے ریلوے اسٹیشن پر میڈیا سے گفتگو کر رہے تھے ۔ شیخ رشید احمد نے کہا کہ ہمارے لیے اعزاز کی بات ہے کہ وزیراعلی ٹرین کے ذریعے سفر کررہے ہیں او راس پر ان کا شکر گزار ہوں ،وزیر اعظم عمران خان بھی نئی چلنے والی ٹرین سر سید ایکسپریس پر سفر کریں گے جبکہ صدر مملکت بھی ٹرین پر سفر کرنے والے ہیں ۔

انہوں نے کہا کہ وزیراعظم عمران خان نے سیاحت کی ترقی کابیڑااٹھایاہے ۔ اسی تناظر میں چار اسٹیم انجن خیبر پختوانخواہ کے حوالے کر رہے ہیں اورصرف انجنوں کے ایندھن کی مد میں وصولی کریں گے ۔انہوں نے عدالتوں کے حالیہ فیصلوں کے حوالے سے کہا کہ میں اس حوالے سے کوئی بات نہیں کر سکتا لیکن اخبارات میں بعض فیصلوں پر تنقیدی نوٹ پڑھے ہیں ،

اعتزاز احسن نے بھی فیصلوں پر سوالیہ نشان کھڑا کیا ہے ، ان کی طرف سے کہا گیا ہے کہ دنیا بھر میں ایسے ضمانتی فیصلوں کی نظیر نہیں ملتی ہے۔شیخ رشید نے کہا کہ مودی کو انتخابات کے پہلے مرحلے میں اس کی سوچ اور خواہش کے مطابق ووٹ نہ ملے تو وہ پاکستان کے اندرونی حالات خراب کر سکتا ہے ۔

اس کیلئے بلوچستان اور خیبر پختوانخواہ میں موجود اپنے نیٹ ورک کے ذریعے پاکستان میں دہشتگردی کی کوشش کی جائے گی لیکن ہم زندہ دل قوم ہیں، وزیر اعظم عمران خان تمام مسائل پر قابو پا لے گا ۔ کشمیریوں نے بھارت کے انتخابات کا بائیکاٹ کر کے پیغام دیا ہے کہ ہمیں صرف کشمیر چاہیے اور کچھ نہیں ۔

قبل ازیں وفاقی وزیر ریلوے شیخ رشید نے سی ای او ریلو ے آفتاب اکبر اور ڈی ایس ریلوے عامر نثار چوہدری کے ہمراہ لاہور ریلوے سٹیشن کا دورہ کرکے اسٹیشن پر جاری تعمیرو مرمت اور تزئین و آرائش کے کاموں کا تفصیلی جائزہ لیا ۔