پی ایس ایل کے نشریاتی حقوق لینے والی بھارتی کمپنی نے لیگ نشر کرنے سے انکار کردیا

لاہور (زرائع) پاکستان کرکٹ بورڈ ( پی سی بی) نے بھارتی کمپنی آئی ایم جی ریلائنس سے پاکستان سپر لیگ (پی ایس ایل) کے نشریاتی حقوق واپس لیتے ہوئے تصدیق کی ہے کہ آئی ایم جی ریلائنس اب لیگ کے میچز نشر نہیں کرے گا۔

پی سی بی نے مشہور بھارتی تاجر مکیشن امبانی کی کمپنی آئی ایم جی ریلائنس کو رواں سال پاکستان سپر لیگ (پی ایس ایل) کے نشریاتی حقوق دیے تھے لیکن اب انہوں نے لیگ کی مزید نشریات سے انکار کردیا۔

پی سی بی کے مطابق آئی ایم جی ریلائنس نے ہمیں مطلع کیا ہے کہ وہ پی ایس ایل 2019 کے بقیہ میچز کے لیے ہمارے ساتھ پارٹنرشپ نہیں کر سکیں گے اور پی سی بی تمام حقوق محفوظ رکھتا ہے۔

یہ بھی پڑھیں:   اسپورٹس فار لائف یومِ پاکستان اسپورٹ فیسٹول کا آغاز 23مارچ کو ہوگا

پی سی بی کے منیجنگ ڈائریکٹر وسیم خان نے کہا کہ بورڈ کے پاس پہلے سے ہنگامی صورتحال سے نمٹنے کا منصوبہ موجود تھا اور ہم پُراعتماد ہیں کہ پیر کو رسمی کارروائیاں مکمل کرنے کے بعد اس پوزیشن میں ہوں گے کہ نئے پارٹنر کا اعلان کرسکیں۔

وسیم نے مزید کہا کہ پی سی بی نے حال ہی میں رونما ہونے والے چند واقعات پر افسوس کا اظہار کیا ہے اور ہمارا ماننا ہے کہ کھیلوں کو سیاست سے الگ رکھنا چاہیے، تاریخ ہمیں بتاتی ہے کہ کھیل خصوصاً کرکٹ نے لوگوں اور ملکوں کے درمیان پُل کا کردار ادا کیا ہے۔

یہ بھی پڑھیں:   پاکستان سپر لیگ کے چوتھے ایڈیشن کا رنگا رنگ میلہ سج گیا

ان کا کہنا تھا کہ بھارتی شائقین کو پی ایس ایل کی ڈیجیٹل نشریات سے روکنا اور اہم تاریخی میدانوں اور مقامات سے وزیراعظم عمران خان سمیت پاکستان کے سابق عظیم کرکٹرز کی تصاویر کو ہٹانا قابل مذمت ہے۔

پی سی بی کے منیجنگ ڈائریکٹر نے کہا کہ بورڈ اس معاملے کو آئی سی سی کے اجلاس میں کھیلوں کی عالمی گورننگ باڈی اور بھارت کے سامنے اٹھائے گا۔

یہ بھی پڑھیں:   پی سی بی نے درجنوں کرکٹرز کو بے روز گار کرنے سے متعلق اہم فیصلہ کر لیا

یاد رہے کہ مقبوضہ کشمیر کے علاقے پلوامہ میں ہونے والے حملے کے بعد بھارت چینل نے پاکستان سپر لیگ (پی ایس ایل) 2019 کی لائیو کوریج کے نشریاتی حقوق حاصل کرنے کے باوجود ایونٹ کی نشریات بند کر دی تھیں جبکہ دیگر بھارتی ویب سائٹس نے بھی لیگ کے میچوں کی اسکور اپ ڈیٹس بند کر دی تھیں۔