جالندھر: بھارت میں انڈین ایئر فورس کا جنگی طیارہ مگ-29 گر کر تباہ ہوگیا تاہم پائلٹ نے گرتے جہاز سے چھلانگ لگا کر اپنی جان بچالی۔
عالمی خبر رساں ادارے کے مطابق بھارتی ریاست پنجاب میں انڈین ایئر فورس کا جنگی طیارہ مگ-29 تکنیکی خرابی کے باعث گر کر تباہ ہوگیا، پائلٹ نے پیراشوٹ کے ذریعے چھلانگ لگا کر اپنی جان بچالی تاہم وہ شدید زخمی ہوئے ہیں۔
ھارتی فضائیہ کے ترجمان نے میڈیا کو بتایا کہ جالندھر کے فوجی بیس سے اُڑان بھرنے والا تربیتی طیارہ مگ-29 قریبی کھیت میں گر کر تباہ ہوگیا۔ طیارے میں تکنیکی خرابی واقع ہوگئی تھی۔
ترجمان کا مزید کہنا تھا کہ پائلٹ نے طیارے سے چھلانگ لگا کر اپنی جان بچائی، امدادی ہیلی کاپٹر نے پائلٹ کو ملٹری اسپتال منتقل کیا۔ حادثے کی تحقیقات کے لیے انکوائری کمیٹی تشکیل دیدی گئی ہے۔
واضح رہے کہ گزشتہ برس بھارت میں جنگی طیارے گرنے کے 12 سے زائد واقعات رونما ہوئے تھے جن میں 20 اہلکار ہلاک ہوئے تھے اور بھارتی فضائیہ کے سابق پائلٹس نے حکومت سے نئے طیارے فراہم کرنے کا مطالبہ بھی کیا تھا۔
