عراق میں امریکی فوجی اڈے پر حملہ، 3 غیر ملکی فوجی ہلاک

بغداد: عراق میں امریکی فوجی اڈے پر راکٹ حملے میں 3 اتحادی فوجی ہلاک اور 12 زخمی ہوگئے۔

غیر ملکی خبر رساں ادارے کے مطابق دارالحکومت بغداد کے شمال میں تاجی فوجی چھاؤنی پر اچانک متعدد راکٹ حملے کیے گئے جنہوں نے امریکی فوجی اڈے میں تباہی مچادی۔

اس فوجی اڈے پر کم از کم 18 راکٹ فائر کیے گئے جس کے نتیجے میں 2 امریکی اور 1 برطانوی فوجی مارے گئے جبکہ 12 اہلکار زخمی ہوئے جن میں سے متعدد کی حالت نازک ہے اور ہلاکتوں میں اضافے کا امکان ہے۔

یہ بھی پڑھیں:   ہندوانتہاپسندوں نے متھرا کی شاہی عیدگاہ میں پوجا کرنے کا اعلان کردیا

اس حملے کی ذمہ داری کسی تنظیم نے قبول نہیں کی۔ عراقی صدر ابراہیم صالح نے واقعے کی مذمت کرتے ہوئے ملوث افراد کو قرار واقعی سزا دینے کا عزم کیا ہے۔ امریکی حکام نے اس واقعے کی تحقیقات شروع کردیں اور حملہ آوروں کی گرفتاری کے لیے علاقے میں سرچ آپریشن کیا۔

یہ بھی پڑھیں:   مسلمانوں کیخلاف شہریت ترمیمی بل کی منظوری،مودی سرکار پریشان-

کیمپ تاجی 2003 میں عراق پر امریکی و برطانوی حملے کے بعد سے غیر ملکی افواج کے زیر استعمال ہے اور 6 ہزار امریکی فوجی تعینات ہیں۔

واضح رہے کہ گزشتہ روز بھی عراق میں داعش کیخلاف فوجی کارروائی کے دوران 2 امریکی اہلکار ہلاک جب کہ 4 زخمی ہوگئے تھے۔