پی ایس ایل کے میچز کھیلنے کے لیے کھلاڑیوں کی پاکستان آمد شروع

کراچی(ماجد اسحاق سے) پاکستان سپر لیگ فور کا متحدہ عرب امارات میں مرحلہ مکمل ہوگیا اور اب ایونٹ کے بقایا 8 میچز کراچی میں کھیلے جائیں گے جس کے لیے کھلاڑیوں کی پاکستان آمد شروع ہوگئی ہے۔

کوئٹہ گلیڈی ایٹرز کے کپتان سرفراز احمد اور چند دیگر کھلاڑی کراچی پہنچ گئے اور وقفے وقفے سے دیگر کھلاڑی بھی کراچی پہنچیں گے۔

کوئٹہ گلیڈی ایٹرز کے اوپننگ بلے باز شین واٹسن آج کراچی پہنچیں گے جب کہ رائلی روُسو، ڈوائین براوو اور فواد احمد بھی پاکستان آنے کے لیے تیار ہیں۔

یہ بھی پڑھیں:   پی سی بی نے آئرلینڈ کو دورہ پاکستان کیلیے باضابطہ مدعو کرلیا

لاہور قلندرز کے کھلاڑی دو مختلف پروازوں سے آج پاکستان آرہے ہیں جب کہ کراچی اور اسلام آباد کی ٹیمیں بھی آج ہی کراچی پہنچیں گی۔

اسلام آباد یونائیٹڈ نے اس بار انگلینڈ کے بیٹسمین ای این بیل کو حاصل کیا تھا لیکن وہ ان فٹ ہو کر پی ایس ایل سے باہر ہو چکے ہیں تاہم یونائیٹڈ کے دیگر تمام غیر ملکی کرکٹرز پاکستان آنے کے لیے تیار ہیں جن میں لیوک رانکی، فلپ سالٹ، کیمرون ڈیل پورٹ اور سمت پٹیل شامل ہیں۔

یہ بھی پڑھیں:   کراچی کنگزکا ملتان سلطانز کو جیت کے لیے 184 رنز کا ہدف

ملتان سلطانز کی ٹیم پی ایس ایل کے پلے آف سے باہر ہو چکی ہے اور اب اس کا صرف ایک میچ لاہور قلندرز کے خلاف باقی ہے، ملتان سلطانز کے منیجر سابق ٹیسٹ کرکٹر ندیم خان کے مطابق ان کی ٹیم کے تمام ہی غیر ملکی کرکٹرز پاکستان جا رہے ہیں۔

کراچی کنگز کے تمام غیر ملکی کرکٹرز بھی پاکستان آرہے ہیں جن میں کولن منرو، کالن انگرم، لونگ اسٹون، سکندر رضا اور روی بوپارہ شامل ہیں۔

یہ بھی پڑھیں:   نوازشریف سے متعلق ٹویٹ پر محمد حفیظ کوسوشل میڈیا پر شدید تنقیدکا سامنا

پشاور زلمی وہ ٹیم ہے جس کے تمام ہی غیر ملکی کھلاڑی پاکستان جاتے رہے ہیں اور ٹیم کے سربراہ جاوید آفریدی کا کہنا ہے کہ اس بار بھی تمام غیر ملکی کرکٹرز پاکستان جائیں گے۔

یاد رہے کہ 9 مارچ کو لاہور قلندرز اور اسلام آباد یونائیٹڈ کے درمیان میچ کھیلا جائے گا۔